Blòg forra-tot & mestissatge occitano-comtés

Bona annada 2010

2010-01-05T04:15:00.000-08:00

Vos desiri una bona annada !

Bon, per l'annada novèla, promés, vau assajar de reviscolar lo blòg ... :)

Serada " Parla la lenga ! " (13 de genièr 2010)

2009-12-04T06:48:00.000-08:00

Serada « Parla la lenga ! »

(Per practicar la lenga occitana : començaires ou parlaires confirmats)

Dimècres lo 13 de genièr 2010 / Mercredi 13 janvier 2010
a 19 o 30 / 19 h 30
al bar lo « Chat … pitre »

Barri / Quartier “Beaux Arts”
5 carrièra / rue Belmont
Montpelhièr – Montpellier

Sud Sound System

2009-05-25T12:48:00.001-07:00

Serà lèu l'estiu, avèm l'enveja de viatjar, de cambiar d'aire e tot aquò ! Fauta de se poder pagar un viatge, es totjorn possible de cambiar lo cd dins lo legidor ! Doncas, vos prepausi un autre grop de descobrir ! Aquí Sud Sound System » qu'es un grop de dancehall/reggae originari de la Polha, dins lo sud d’Italia, mai precisament de la region de la Salento. De notar que i son pro coneguts e que fan partida dels pionièrs del Raggamuffin italian. Dins sa musica, emplegan lo dialècte salentin qu’es pròche del sicilian. Son primièr albom sortiguèt en 1991 e lo darrièr en 2008 a l'ora d'ara : Dammena ancora.

Lor sit : http://www.sudsoundsystem.eu/
Myspace del grop : http://www.myspace.com/sudsoundsystem
Pagina Wikipèdia : http://fr.wikipedia.org/wiki/Sud_Sound_System

Festenal "Arabesques" a Montpelhièr

2009-05-18T04:28:00.000-07:00

L'estiu arriba e los festenals tanben ! Aquesta setmana (21,22 e 23 de mai) se debanarà a Montpelhièr lo festenal "Arabesques" (rescontre dels arts del monde arabi). I serai lo dissabte de ser per l'omenatge a Mahmoud Darwich, poèta palestinian e los concèrts d'Amazigh Kateb e Souad Massi, cantaira argeriana.

Mai d'entresenhas aicí : http://www.festivalarabesques.fr/

Mahmoud Darwich : http://fr.wikipedia.org/wiki/Mahmoud_Darwich
Amazigh Kateb : http://blog.amazighkateb.com/
Souad Massi : http://fr.wikipedia.org/wiki/Souad_Massi

"Nos enfants nous accuseront"

2009-04-30T06:07:00.000-07:00

Auèi al Conselh General de Gard, èra organizada la projeccion del film “Nos enfants nous accuseront” que parla de las problematicas alimentàrias e de l’alimentacion bio. Aquel film foguèt virat dins Gard e tracta lo subjècte amb coma tela de fons la mesa en plaça d’una cantina bio a Barjac, vilatge al pè de las Cevenas. Film plan interessant que toca a d'aspèctes diferents : l'emplec dels pesticidis dans l’agricultura e dels produches quimics dins l’alimentacion en general, aumentacion dels cancèrs, particularament en cò dels enfants, polucion de las aigas, possibilitat de passar a una agricultura e a una alimentacion biologica, … Lo film es pro long (1O45), passam d’extraches d’un collòqui de cercaires, a d'entrevistas d'agricultors e a de passatges sus la vida de la comuna e de l'escòla.

Plan segur, aquò dona mantun còp l’enveja de se plorar. Quand los compausants nocius del repais de la cantina o del gostar dels mainatges son destriats un per un, quand una maire parla de sa filha jovenòta tocada per un cancèr, o quand un productor qu'utiliza de pesticids parla dels efièches suls membres de sa familha … Mas aquò dona mai que mai de vam per se dire qu’es possible de soscar a un autre tipe de foncionament. D’efièch, lo latz dramatic de la situacion qu’es presentada balança amb lo latz positiu de la capitada de l’introduccion del bio a l’escòla de Barjac e los testimoniatges dels agricultors qu’an causit de produsir sens emplegar la quimia. Lo film met en valor los paisatges de la region, e s'ausis quitament un pauc d'occitan.

Assaji d'anar al mercat lo mai possible la dimenjada per crompar bio o local mas soi de mai en mai desesperat quand vau dins los supermercats : de fruches e legums non bio que faguèron dels viatges longs per n'arribar aquì alara que la meteissa causa es producha a qualques quilomètres, de tomatas plan rojas tota l'annada, ... Cal desvolopar l'agricultura biologica mas subretot democratizar l'alimentacion bio per totes que, malurosament, tot lo monde a pas los mejans d'anar crompar de bio o de léser per anar al mercat. Per aquò, cal una volontada politica vertadièra que decidisca d'ajudar los productors : manjar sanament dèu pas èsser un luxe ! Cal ajudar los qu'emplegan de pesticidis a passar a quicòm mai per els e pels autres. Aqueste sistèma dona vertadièrament lo descòr en mespresar l'uman. Lo bio dèu pas èsser la pichòta taula dins un canton del supermercat ("À es Nadal, vau crompar bio pel repais !") reservat a las gens ricas que se o pòdon permetre, cal arribar al tot bio per totes. Pasmens, podèm pas que saludar lo desvolopament del bio dins la distribucion granda qu'es prepausat ara dins las marcas distributors e qu'es a encoratjar.

Facebook & co.

2009-04-29T08:02:00.000-07:00

Internet es una causa tras que bona plena de causas plan practicas mas de còps, aquò ven un pauc fòl ! D’efièch, Internet es lo simbòl del desvolopament de la comunicacion e de l’informacion, o puslèu del subre-desvolopament de tot aquò ! L’autre còp, descobriguèri la version nòva de ma bostiá mèl (qu’es en cò d’un albergaire que donarai pas lo nom) e paf : Fenèstra « pop-up » coma se ditz, recebèri una invitacion venguda d’endacòm mai per acceptar un amic !!?? Noooooon ! Aprèp MSN, Copains d’Avant, Facebook, Twitter, (...) sens comptar lo molon de sits desconeguts ont te cal cercar d’amics, que te mandan sens relambi de convidacions per te parainar. Ara, es quitament pas mai possible d’anar tranquilament veire son corrièr sens que tot lo monde sián al fial e de recebre « Salut, ça va ? … » o « Adieu, va plan ? » s’avètz l’astre d’aver d’amics occitanofòns. Plan segur, es un brave signe de popularitat (que sus Internet se calcula al nombre d’amics) e se calriá regaudir ...

Si que non, i a Facebook que soi (encara a l’ora d’ara) inscrich … Cresi qu’es la meteissa causa per fòrça personas : a la debuta, resistisses, dises qu’aquò’s una pèrta de temps, que vòs pas espandir ta vida privada sul malhum a la vista de totes, qu’es la debuta de la dictatura de Big Brother qu'es a mand de fichar la tèrra tota. Puèi, ven lo moment critic, totes los amics (que son saique dins la combina de la conspiracion d’aqueste enganaire de Big Brother) te demandan se i sès, que lor te cal mandar quicòm (e plan segur es pas mai possible per qué que siá de foncionar sens passar per Facebook) . E un jorn, lo drama, vas sus la pagina del mostre, te creas un compte e los ideals bèls existisson pas mai ... ! Bon, aprèp la jòia de la descobèrta, i a sovent lo retorn sus tèrra : aprèp aver charrat un còp amb d’amics ancians o de coneissenças (que venguèron d’ « amics » pr’amor tot lo monde son amics sus Facebook), vistalhat los fòtos de las gens coneguts e desconeguts (sus Facebook , se pòdon veire las fòtos de totòm), fach qualques tèstes bravament instructius de l’estil « Quin d'aquò's sès ? » (que tot lo monde poiràn veire la resulta), marcar las caras de los tieus amics sus las fòtos dels perfils (Mèfi!, cal vertadièrament aver d’amics leials per defugir las fòtos "comprometentas"). Enfin, soscas de te desinscriure, de quitar lo monde meravilhós de Facebook. En mai d'aquò, d'en pertot dins las medias, es la psicòsi que degun sap pas ont van las donadas e patin-cofin ... À quina jòia ! Bon, vos daissi, vau agachar mon perfil !

" L'invencion del Sègle " o " la revolucion del campatge"

2009-04-28T04:24:00.000-07:00

Primièr, atencion : ai pas d'accions en cò del vendeire e ne farai pas de pub per el, (demorarà anonim !), solide, aquò's pas la tòca d’aqueste article mas ne vos parli que la causa es vertadièrament interessanta ! Òc, pensi qu'es benlèu una de las invencion far de la primièra partida del sègle XXI (o benlèu quitament L’invencion del sègle ?). Aquò's tot simplament lo simbòl de la revolucion del campatge ! E qu'es aquò ? Lo tibanèl lèst en 2 segondas, lo temps que cal per que se desplegue. Tant-val-dire qu'es la fin del campatge alassant amb un montatge de 1 ora a cercar las sardas per acabar amb un d’aquò’s desformat que pren aiga. Ara, es de bon campar !

Se presenta jos la forma d'un cercle de la color de ta causida (roge, verd, …). Si que non, existisson d'autres modèls : la « 1 segonda per 1 persona », de « 2 segondas mai granda » e lo flame novèl tibanèl familhal gigant « 4.2 (segondas ?) ». E mai, lo pretz es pas tan naut qu’aquò. Personalament, soi fan. Basta de dobrir lo sac, de sortir lo cercle, de levar un elastic e fin finala de lo gitar per ... ò miracle ... veire la tenda quilhada davant sos uèlhs meravilhats e davant los uèlhs geloses dels que son a montar lo lor dempuèi una ora). Rai, aquò demanda un briu d’entrainament mas un còp la manipulacion assimilada, es vertadièrament montat en gaireben 2 segondas. D’experiéncia, lo podètz montar jos la pluèja en arribar al campatge e èsser lèu a la sosta. Conselh : podètz evitar de lo dobrir a l’ostal qu’es un bon biais de tot petar (experiéncia viscuda). Per l’anecdòta, l'objècte venguèt un simbòl dins los medias, dins l'encastre de las revendicacions pel drech al lotjament (que comencèt al Canal Sant Martin a París). Per un còp, s'agís pas d'un gadgèt inutil e car mas de quicòm vertadièrament util e practic. Es lo mejan de democratizar lo campatge pels que son malbiaissuts. Normalament un còp desplegat, podètz dormir dedins mas en opcion, se i a de vent o de pluèja, es possible de la fixar al sòl coma pels tibanèls classics.

Pr’aquò, quitament per l’objècte perfièch, i a un pichòt ponch negre : es puslèu de mal transportar vist sa forma en cercle. Ja, prend de plaça per lo recaptar e lo portar a l’esquina es un bon biais de semblar a una tartuga o a una catarineta (pel modèl roge). Doncas, benlèu qu’es pas lo tibanèl de causir pel barrutlatge a pè mas es perfièch pels viatges en veitura. Bon, stòp! Vau quitar de faire de la pub a gratis (o deurai demandar un finançament) mas bon l’objècte vàl lo còp !

ADaM Project

2009-04-12T08:27:00.001-07:00

Un sit que m’agrada e ça que la qu’es ja dins los ligams del latz esquèrra : « ADaM-Project ». Lo concèpte es simple, cal prene de fofografias de sa jornada sens cèrca particulara d’estetisme e marcar l’ora de caduna, apondre un pichòt comentari e mandar lo tot. Puèi lo sit expausa las òbras dels participants e las fòtos son archivadas sul sit per mots-clau. Es interessant d’agachar çò qu’es estat fach, la seguida dels imatges dona un estil « cinema » amb sovent fòrça fosc. Aital, se seguís lo movement d’una jornada que se debana cronologicament. Per los que vòlon participar, vist que la darrièra « jornada » aponduda data de 2007, sabi pas se l’experiéncia contunhe encara. L’autor explica lo concèpte aital : « Es un assag de representar çò que nos liga totes. Un autre biais d'agafar, de sarrar l'istòria d'un malhum. » Anatz lo vistalhar qu’aquò val lo còp !

Lo sit : www.adamproject.net

Sostitratge en Òc

2009-04-07T12:04:00.000-07:00

Òsca a Mertyl (qu'escriu lo blòg "La marrida vida" qu'es aquì : http://mertyl.blogspot.com/) qu'a mes en linha los sostítols en occitan del film "The Godfather" ("le parrain" en francés), del dessenh animat "Wall-E" e d'un episòdi de la seria "Heroes". Plan segur vos cal una copia del film per poder n'aprofechar sus l'ordenador vòstre, mas es una bona debuta ! A revirat lo sit opensubtitles.org tanben qu'alberga aqueles sostítols. Una iniciativa de la bona pr'amor aquò manca de pas poder aprofechar de cinema en occitan, pel mens en sostitolats. Calriá desvolopar la revirada de film puèi prepausar l'apondon d'un sostitratge en òc als realisators que o desiran (en començar per los realisators originaris de regions occitanas o los que realisan de films que se i debanan). Se pòt trobar d'inspiracion en cò dels catalans e de la "Plataforma per la llenga" que desvolopa d'iniciativas per la preséncia del catalan dins lo domeni del cinema a lor nivèl. Podètz veire la presentacion de l'accion aicí : http://www.plataforma-llengua.cat/cinema/elsGomis.html

Lesca de ma vida # 2

2009-04-07T11:56:00.000-07:00

I a pas mai de son sus l'ordenador e totas las presas USB marchan pas mai ! Vos escrivi donc d'una ordenador mut e paralizat ! Aürosament, la coneccion internet es totjorn aquí! (of!). Sabi pas çò que se passèt. I aguèt un problèma amb una presa USB que començava de desconar e qu'empechava l'ordenador de s'amodar (Sabetz que son vertadièrament tras que sensibles los ordenadors !). Foguèri obligat de la desactivar, e ara es pas mai possible de brancar un d'aquò's USB quin que siá sus las autras : legidor MP3, estampadoira, disc dur extèrn, ... Pas res ! Solide, que comença de se far vièlha la maquina, mas bon òm espera totjorn qu'ane subreviure encara un briu ...

Lesca de ma vida # 1

2009-03-22T10:29:00.000-07:00

Fau pas aqueste blòg per contar ma vida, mas bon … Ai lo drech de causir çò que vòli escriure. Alavetz, per un còp, me vau daissar anar al plaser d’un pichòt article sus la vida mieuna, a la jòia d'expausar ma vida privada sul malhum ! Es l'escasença de personalisar un pauc aiceste blòg tanben ! Farà lèu 3 ans que demòri a Montpelhièr e en Occitània quitament. Dempuèi lo mes de Decembre trabalhi al Conselh General de Gard a Nimes. Primièr emplec, trabalh suls mercats publics, collègas simpàs, ... En un mot, de positiu ! De mai, descobri Nimes, m’agrada de passejar per la vila, es un biais de descobrir un canton novèl, de barris, de carrièras ... Nimes es una vila fòrça bèla, diferenta del Clapàs. M'agrada mai las vilas pas tròp grandàssa donc es perfièch. Me calrà botar de fòtos de mas passejadas. Soi vengut un acostumat de la linha Montpelhièr => Nimes / Nimes => Montpelhièr. Dins lo tren, as lo temps de legir, de trabalhar (l’occitan), d’escotar de musica, d’acabar la nuèch tranquilament, de rescontrar de monde, de remirar lo meteis paisatge cada jorn per veire se i a pas quicòm qu'as pas remarcat … Es de temps liure per far çò que vòles ! Donc, fin finala, m'anuja pas de tròp e es mens alassant que la veitura.

La prima es arribada lèu lèu e se sentís ja que l’estiu seguirà. Serà d’escasenças de barutlar un pauc d’en pertot a l’entorn de Montpelhièr, sai que un pauc mai luènh (pensi que anarem descobrir Niça en junh), de tornar veire la Franca-Comtat, ... E es mai aisit d'anar al trabalh quand fa jorn d'ora de matin e que solelha pendent la jornada ! E amb la prima e l'estiu, i a los festenals e un fum de concèrts que son anonciats, aquò dona forçadament de vòia !

Senon, fau ma segonda annada de licéncia d'occitan a distància. M'agrada fòrça, soi totjorn motivat e mai cal trobar lo temps per trabalhar. Es un plaser de contunhar d'aprene la lenga en descobrir lo país per la passejada, en rescontrar de monde. Abans d'arribar aquì, èri ja al fial de la necessitat d'aparar e de desvolopar las lengas minorisadas coma l'occitan, mas ara experimenti vertadièrament que l'occitan es un pont, un enriquiment e un biais de s'integrar.

Die Welle ( L'Èrsa en òc, La Vague en francés )

2009-03-15T02:18:00.000-07:00

Per explicar a sos escolans çò qu’es l’Autocracia e lor mostrar que lo retorn d’una dictatura es encara possible, un professor decida de metre en practica la construccion de las basas d’una dictatura dins sa classa. Aital, après aver insistat sus la necessitat de la disciplina e de la solidaritat del grop, trabalha amb la classa a la creacion d'un movement que noman « L’Èrsa », li causisson un simbòl, un unifòrm e un salut. Pauc a cha pauc, lo professor perd lo contraròtle de la situacion e lo movement coneís un succès inquietant per delà la classa. Aqueste film alemand es inspirat d’un roman american, li meteis inspirat de faches reals d'una experiéncia que se debanèt dins un licèu de California en 1967. Se tròban dins lo film, las referéncias a l'Alemanha que cerca cossí parlar dels moments escurs de son istòria, un passat sovent pesuc per la joventut d'uèi. Un film fòrça interessant per son subjècte e son scenari e mai, benlèu, d'unes trobaràn qu'es presentat d'un biais que fa un pauc tròp film per jove (musica, ritme, personatges, ...) e que se pòt considerar que lo film tracta d'un biais pas pro aprigondit del mecanisme que fa derivar cap a las rasigas d'una dictatura. Mas, fin finala es interessant per l'aparència que dona lo film als eveniments, que venon pivelants pels espectators tanben ... fins al final que vos contarai pas !

Un article wikipèdia a prepaus de l’experiència reala (en francés) : http://fr.wikipedia.org/wiki/La_Troisi%C3%A8me_Vague

Serada " Parla la lenga "

2009-03-15T01:53:00.000-07:00

Lo 6 de març de ser, organisèri una serada-test « Parla la lenga ! » al bar lo « Chat Pitre » dins lo barri « Beaux Arts ». Emai se i aviá mens de monde que çò que foguèt esperat (mai de comunicacion seriá estada necessaria), los vejaires positius e la preséncia de personas interessadas pel fach de poder parlar la lenga me convenquèt que l’idèia èra interessanta.

Organizar una serada coma aquela a mai que mai per tòca d’acampar las gents que vòlon parlar occitan. Es un pauc un biais de tornar a la sorga : l’occitan es una lenga, aquò se parla ! Primièr, es clar que lo biais melhor d’aprene una lenga o de melhorar son nivèl es de la parlar. Per lo cas de l’occitan, es possible de seguir de corses mas, dins la vida vidanta, fin finala mancan d’escasenças de la poder practicar per la mager part. Puèi per fòrça monde, se pausa sovent la question « perqué aprene una lenga s’es pas possible de la parlar ? ». A l’ora d’ara, subretot dins una vila coma Montpelhièr, la lenga es pas gaire presenta dins la vida de cada jorn en defòra del mitan occitanista. E mai quand i a una escasença, dins la vida publica, es pas totjorn aisit de cambiar de lenga quand lo francés es la lenga costumièra de la societat. Ieu, personalament, cerqui totas las escasenças ont pòdi pel mens pronónciar qualques mots en occitan.

Doncas fin finala, cal desvolopar la practica de la lenga per d’autres biaisses en organisar de moments ont l’occitan pòsca tornar trobar sa plaça. D’en primièr, la serada s’adreiça a las personas qu’an pas fòrça escasenças de parlar occitan. Mas es tanben un biais de lor far rescontrar los que l’emplegan cada jorn. Dins lo Val d’Aran, s’es mes en plaça lo program « Volontariat per Aranés » que met en ligam las gents que vòlon aprene la lenga e los volontaris que la parlan. Es l’amira d’una serada coma aquela tanben.

De mai, i a la volontat de causir un endrech dins la vila, dins un bar qu’es un luòc de charadissa, de rescontre, d’escambi e mai que mai un luòc de la vida de la ciutat, un luòc de cada jorn. De plaçar l’occitan dins un encastre normal d’usatge d’una lenga e de l’occitanizar (o puslèu de lo tornar occitanizar). E mai s'es ligada a una cultura rica e fòrça importanta, pensi tanben qu’es quitament interessant de poder separar de còps que i a la lenga de l’encastre occitanista (musica, balèti, …). Plan segur, parlar la lenga dins l’encastre d’una serada organisada es pas gaire espontanèu, mas estant la situacion actuala, es necite. Aital, aquò serà tornat organizar e seriá plan de poder metre en plaça lo rendètz-vos un còp cada mes.

Serada " Battle Ragga Balèti "

2009-02-14T09:52:00.000-08:00

Lo 12 de Març 2009 a l'Antirouille (Montpelhièr)

Serada " BATTLE RAGGA BALÈTI "

www.myspace.com/oxivent

Una serada de pas mancar ! :)

Mallacan & l'aragonés

2009-02-14T00:18:00.000-08:00

Mallacan es un grop originari de Saragossa (en Aragon) e que canta en aragonés. Son estil musical es de Rock/Ska amb d'instruments tradicionals e de paraulas engatjadas. Nasquèt en 1992 e a ja produch 4 albòms : « Entalto a reboluzión! » en 1995, « Luen d'o paradiso » en 1999, « Chera chera! » en 2002 e « País zierzo » en 2005. Al nivèl lingüistic, l’aragonés, que se sòna tanben « la fabla », es una lenga romanica que se situa entre lo catalan, l’occitan e lo castelhan (espanhòl) e que possedis d’afinitats amb aquestas tres lengas. Foguèt considerada coma un dialècte del castelhan per la lingüistica romanica tradicionala e non coma una lenga pròpra, mas es considerada per ara coma une lenga independenta dins las estudis recentas. Considerada coma en perilh d'escantiment, lo nombre de locutors es estimat a gaireben 10 000 uèi. Pasmens n'existisson de novèls dins las vilas aragonesas grandas qu’èra castelhanizadas de per abans. La lenga coneguèt una reculada importanta dins l’istòria amb la castelhanizacion d’una granda part de l’Aragon, puèi mai que mai pendent lo regim de Franco qu’enebiguèt son usatge. A l’ora d’ara, existisson mantun movement cultural aragonés que militan per l’aragonés, dont lo « Consello d’a Fabla Aragonesa » e la « Sociedetat Lingüistica Aragonesa ». Aqueste darrièr revendica una grafia vesina de las de l’occitan e del catalan e s’aluènha de la de l’espanhòl. Dempuèi 2005, « l’Academia de l’Aragonés » trabalha tanben al desvolopament de la lenga.

Lo myspace del grop : http://www.myspace.com/mallacan
Lo sit (pas de mesa a jorn) : http://www.mallacan.org/

Lo grop en concèrt amb en prima los sostítols en aragonés ;) :

Kebab-frites.com

2009-01-20T10:02:00.000-08:00

Kebab-frites.com es un annuari e un sit de comparason dels vendeires de Kebab de França. Aquò's una idèia originala e simpà vist que lo kebab es dintrat vertadièrament dins lo païsatge de la mangiscla rapida e es vengut quitament un simbòl ! Gràcias a "Kebab-frites.com", trobaretz per cada vila, una tièra dels establiments amb per cadun una fica que vos dòna d’informacions e una evaluacion de la qualitat del servici. Aital, son notats per criteris fondamentals esperats dins aquesta mena d'endrech : acuelh, cruditats, salsas, frescor, igièna, carns, fritas, quantitat, … De mai, lo siti vos dòna la possibilitat de daissar de comentaris per donar vòstre vejaire e d’apondre un "kebabaire" qu’existis pas encara dins la basa de donadas. En bonus, trobaretz l’istòria del Kebab (aquò's plan instructiu !) , de sondatges (per ara, es « Quina salsa amb ton kebab ? »), l'actualitat del Kebab (!! : lo kebab dins lo monde, kebab e musica, ...). De mai, coma autra bona idèia, i a tanben de recèptas de cosina totjorn ligadas amb lo monde del Kebab : pel moment podètz trobar cossi far la salsa blanca e la salsa samorai. Un sit de veire !

L’adreiça : http://www.kebab-frites.com/

Lo pichòt Nicolau

2009-01-18T00:13:00.000-08:00

Coneissètz lo pichòt Nicolau ? Non :) subretot cal pas pensar a un omonime ... Parli del personatge creat per Goscinny e Sempé en 1960, eròi d'una tièra de libres pels dròlles ! Se i a ben de libres que m'agradariá de veire revirats e de legir en òc, serian los del Pichòt Nicolau ! Legiguèri fòrça aqueles libres quand èri jovenòt e francament me fa totjorn plaser de tornar legir qualquas istorietas de còps que i a (òc, l'avoi :). Conta las aventuras de Nicolau qu' es un dròlle coma los autres. Viu en vila e va a l'escòla. A tot un fun d'amics, de parents, una grand, una regenta, de vesins, ... L'originalitat de l'estil dels libres es que las istòrias son contadas del ponch de vista de Nicolau, lo ponch de vista d'un maintatge que conta amb sos mots e sa vision de las causas çò que viu. Aquò dòna un estil fresc e una granda leugièretat. En mai d'aquò, los dessenhs negres e blancs de Sempé dònan fòrça agradança a las istòrias e contribuïsson de donar una arma als personatges.

Ponch negre : dempuèi pauc de temps, la licéncia es fòrça espleitada amb lo risc de faire dels libres un produch tròp commercial e de faire pèrdre l'originalitat d'origina. Ara, i a ja un dessenh animat creat per la television e una sortida al cinema es prevista per 2009. L'idèia de ne far un film me fa un pauc paur. Metre a l'ecran un personatge e d'istòrias que coneguèron lor succès pel biais d'escriure es un pauc dificil : serà pas mai vertadièrament la meteissa causa ! ... Enfin ... Es la consequéncia del succès. Los libres son ja estats revirats en alemand (Der kleine Nick) e en anglés (The little Nick) : Perqué pas en òc ? Vista son succès, seriá una revirada interessanta per la literatura - joventut en occitan.

Revirada dels títols dels libres de la seria :

Lo Pichòt Nicolau - 1960
Las Recreacions del Pichòt Nicolau - 1961
Las Vacanças del Pichòt Nicolau - 1962
Lo Pichòt Nicolau e los companhs - 1963
Lo Pichòt Nicolau a d'embestiaments - 1964
Istòrias ineditas del Pichòt Nicolau - 2004
Istòrias ineditas del Pichòt Nicolau, volume 2 - 2006

De metal en occitan ...

2009-01-08T12:19:00.000-08:00

O disi ja : escoti pas cap de metal, mas soi fòrça curiós en general e m'agrada de descobrir d'estils novèls de musica. Doncas, existís de metal en occitan. Aquò pòt èsser pas qu'una bone causa que l'occitan siá emplegat per de grops de metal per la promocion de la lenga. Se son donats lo títol de grop de "Folk metal occitan". Ben òc, l'especialitat dins lo metal e dins la musica "alternativa" es d'inventar d'estils novèls, o sabètz ! Cò que serà vertadièrament ben, serà quora serà possible de far de metal en òc sens dever inventar un estil pròpri ... Mas bon ... Donc aqueste grop famós se sòna "Hantaoma" (son gascons) e fa de "Folk metal occitan" e lor albom primièr e unenc se sòna "Malombra". Seriá malaisit de ne vos far una critica que soi pas un brieu acostumat del genre ! L'estil visual del grop es fòrça medieval, dins l'estil "barbars de pels longs vestits de negre", e la tematica pro negra amb de títols de cançons coma "malombra" o "La ronda dels mòrts". Las paraulas son inspiradas de cants tradicionals e de legendas d'Occitània. Al nivèl de la musica, legissi qu'es un mescladís d'heavy / trash / black metal (!) amb d'instruments electrics e acostics. Vaquí, benlèu que "Hantaoma" donarà d'idèias a d'unes d'emplegar la lenga occitana dins d'autres estils de musica que l'òc pòt èsser d'en pertot !

Lor myspace : http://www.myspace.com/hantaoma

Bona annada 2009

2009-01-02T04:42:00.000-08:00

Coma es la costuma :
Vos desiri una bona annada 2009 !
Per l'escasença, vaquí qualquas fòtos de fin d'annada de Besançon (que son pas de ieu !)

" Morís dapàs " de Pablo Neruda

2008-12-20T06:41:00.000-08:00

Revirada en occitan - Tèxt de Pablo Neruda - Títol original : " Muere lentamente "

Morís dapàs lo que viaja pas,
Lo que legís pas,
Lo qu'escota pas de musica,
Lo que sap pas trobar gràcia a sos uèlhs.

Morís dapàs
Lo que destrutz son amor pròpri,
Lo que se daissa pas jamai ajudar.

Morís dapàs
Lo que ven esclau de la costuma
Tornant far cada jorn los meteisses camins,
Lo que cambia pas jamai d'amiras,
Se risca pas jamai de cambiar la color de sos vestits
o que parla pas jamai a un desconegut

Morís dapàs
Lo que fugís la passion
E son revolum d'emocion
Las que tornan donar la lutz dins los uèlhs
e reparan los còrs nafrats

Morís dapàs
Lo que cambia pas de cap quand es malurós al trabalh o en amor,
Lo que pren pas de risc
per realizar sos sòmis,
Lo que, pas un còp dins sa vida,
fugís pas los conselhs senats.

Viu ara !
Risca-te uèi !
Agís sul còp !
Priva-te pas d'èsser urós !

Cossí jogar agratis amb vòstre ordenador ?

2008-12-02T12:13:00.000-08:00

Los emulators son de programas que permeton de simular un consòla de jòc (o encara un autre sistema informatic) sus un ordenador. Aital, aquò dòna la possibilitat mudar un ordenador en consòla de jòc. Doncas, es a dire qu'es possible de tornar jogar a totas los jòcs de las ancianas consòlas. S'aviatz pas d'argent per crompar totas aquelas consòlas que vos fasián enveja, mas qu'èran tròp car per vòstra borsa, ara es possible ! Existisson fòrça emulators e un fum de sitis que vos prepausan de los telecargar.

Quand èri mai jove, èri afogat de jòcs videos, aquò me passèt mas es totjorn un plaser de poder tornar trobar los jòcs vièlhs ! Es l'escasença de tornar jogar als jòcs que faguèron l'istòria del jòc vidèo : lo primièr "Mario" sus Nintendo, "Zelda", "Sonic" sus Master System e Megadrive, ... Plan segur ... Los jòcs son jos la forma de fichièrs que se sònan las "roms" : vos cal lo jòc original per lo poder telecargar, mas cal tanben saber legir entre las linhas ! ... Subretot que fòrça d'aqueles jòcs son ara plan ancians e gaireben introbables ! Finala, fasètz vos plaser ! :) De mai, l'ordenador prepausa de possibilitats nòvas coma las de salvagardar vòstras partidas dins totes los jòcs, de jogar amb la maneta que volètz, ... Existisson tanben de logicials per jogar en linha amb d'autres jogaires a aqueles jòcs ancians ! Un biais per los tornar descobrir uèi ! Totas las consòlas son emuladas : Nes, SuperNintendo, Nintendo 64, Game boy, Master System, Megadrive, Game Gear, Neo Geo (una consòla fòrça cara a l'epòca !), Jaguar, las consòlas ancianas d'Atari, ... Los emulators dònan la possibilitat de constituir una mena de musèu del jòc video. Aital, es un plaser de poder tornar jogar a tot aquò ! Las consòlas qu'utilisan de Cd coma supòrt pòdon tanben èsser emuladas mas cal telecargar lo jòc jos la forma d'un fichièr .iso e lo gravar sus un Cd per lo poder legir.

Dins lo meteis estil, podètz trobar çò que se sòna en anglés "l'abandonware" (se pòt prepausar coma revirada occitana "abandongicial" se volètz) . Son de jòcs vièlhs per ordenador que foguèron de jòcs pagants del comèrci , mas que son ara agratisses e telecargables sus Internet, vista que son ancians. Plan segur es sovent un truc de tornar trobar los jòcs d'abans ! Al nivèl dels grafismes, la comparason amb çò fach uèi pòt èsser pron rufa ... Mas trobatz de jòcs qu'an plan vielhit e que son totjorn ben simpàs de jogar encara al sègle 21. Los grafismes èran sovent compensats per de concèptes originals (Lemmings, Worms, ...). E d'unes pòdon èsser encara fòrça adictius ! Mas i a tanben de jòcs pas tan vièlhs mas que son ja despassats, estant la velocitat de l'evolucion dins aqueste domeni !

Podètz picar "émulation", "rom", "émulateurs" o "abandonware" sus Google per trobar los sits que vos cal, mas vaquì una pichòta seleccion :

Mondemul : http://www.mondemul.com/
Rom world : http://www.rom-world.com/
Abandonware (en francés) : http://www.abandonware-france.org/

E tanben per la cultura :

L'istòria del jòc video : http://fr.wikipedia.org/wiki/Histoire_du_jeu_vidÃ©o

Inter'Rail 2008 : Viatge en Euròpa !

2008-11-19T11:49:00.000-08:00

Es l'ivèrn, serà lèu Nadal ... Mas es pas enebit de parlar encara de l'estiu passat e de las vacanças ? Non ! Doncas vos parlarai de mon viatge "Inter'Rail" d'aquel estiu. Per los que sabon pas, la carta "Inter'Rail" es una carta de tren que permet de viatjar tan que volètz pendent una periòda donada (de causir). Es possible de causir un país o de prene una carta per Euròpa tota (çò que faguèrem). Èra mon segond viatge amb aquela carta. Fa qualquas annadas, faguèri Espanha (País Basc, Castelha, Galícia, Extremadura, Andalosia, ...) e lo Portugal (Porto e Lisbona) amb un amic.

Aquesta annada, lo viatge nòstre durèt del 4 al 27 d'agost 2008 amb coma trajècte : Italia (Roma, Nàpols, Barri) ==> Grècia (Atenas, Tessalonica) ==> Turquia (Istambol) ==> Bulgaria (Sòfia) ==> Romania (Bucarèst) ==> Ongria (Budapèst) ==> Eslovaquia (Bratislava) ==> Àustria (Viena) ==> Franca-Comtat ! Es pro dificil de resumir un viatge coma aquò ! Cresi que ne poirai faire pas qu'un resumit forra-borra. Partiguèrem a quatre : Depart de la gara de Dijon, per un viatge de nuèch, 12 oras fins a Roma.

Fòrça causas bèlas ne veguèrem ... Mas en delà d'aquò, I aguèt tanben l'ambient del viatge : las nuèches gaireben blancas dins los trens, los rescontres amb d'autres viatjaires, las arribadas dins las vilas desconegudas, los contactes amb d'autras lengas, ... Entre Atenas e Tessalonica, dormiguèrem entre los sètis, vist qu'èra claufit. I aviá las gens que parlavan entre las veituras, la nuèch tota, lum alucat, ... De matin, dins lo vagon, una maire que faguèt calfar lo lach del botelhon de son nenon, dins una caçairòla, amb un rescaud jol sèti ... Senon, prenguèrem lo batèl a Barri, dins lo Sud d'Italia, per anar a Patràs, en Grècia sus l'autra còsta. Fòrça remembres dins las albèrgas de joventut que son de luòcs plan simpàs. L'escasença de crosar totes los que viatjan amb lor sac a l'esquina. Sabes pas jamai ont vas arribar, ... Dormitòris vielhs e crassoses o granda cambra polida ?! M'agradan fòrça aquelas albèrgas !

Pensi que lo còp de còr del viatge foguèt Nàpols ... Èra pas la ciutat mai luènha, mas sembla vertadièrament a las pòrtas de l'Africa. Francament, un autre mond aprèp Roma qu'es tot net, una vila que lusís ... Aquò mòstra ben la diferéncia entre sud e nòrd d'Italia. Plan segur es pas suau, aquò's brusent, cacofonic quitament, aquò groa, mas aquò viu, e, fin finala pòt pas daissar insensible ! Senon i aguèt Istambol tanben, la pòrta d'Orient a l'extremitat d'Euròpa, que viu al ritme dels apèls dels minarets : Visita de Santa Sofia, de la mosquèa blava, ... e passejada per las carrièras mens toristicas en defòra del centre. A Budapèst : momenton passat defòra dins los banhs cauds a 40 gras. Lo viatge nòstre s'acabèt a Viena qu'es lo contrari perfièch de Nàpols amb sas carrièras mai que candas, sos monuments grandarasses d'en pertot, lo castèl de "Shonbrunn" que fa decòr de cinèma ... La cervesa que i es fòrça bon mercat foguèt lo biais mèstre per festejar la conclusion de la nòstra virada.

E los viatges, son per manjar tanben e descobrir de daquòs qu'òm coneis pas. Quand nòstras finanças nos o autorisavan, nos paguèrem qualques bons repaisses per tastar la cosina locala. Estant los preses basses en Romania, Bulgaria e Ongria, avèm plan manjat : pebrons farcits al iaort (e de pebrons cosinats de totas las menas), ragost, plat de polentà, buòu a la salsa a las cerièras, ... Pas que de bon !

Cò que se calrà recordar es qu'aquò val francament lo còp de gardar d'argent per viure d'experiéncias coma aquela !

Lo sit d'InterRail en francés : http://francais.interrailnet.com/enfr/

Per delà Atlantic ...

2008-11-05T12:13:00.000-08:00

Cal pas èsser tròp allergic als Estats-Units per ara. Los mediàs ne parlèron de longa, mas tornamai o fau ieu tanben ! :) Ièr, Barrack Obama venguèt lo president democrat novèl dels Estats-Units e lo primièr president mestís afro-american de l'istòria del país aprèp dos mandats republicans de George Bush. Dempuèi un cèrt temps, se parla d'Obamanià d'en pertot en America, mas tanben dins lo monde tot. En faciá del conservatisme, del tot-liberalisme economic, del nationalisme (guèrra en Irak, patriot act...) dels Republicans. Lo president novèl prepausa una alternativa per mai de justícia sociala. Obama vòl investir dins l'assegurança-santat, es favorable a la regularizacion d'imigrats clandestins, es per la causida per çò que tòca a l'asòrtament ... Subretot, Obama mòstra la volontat de seguir la dralha d'una America mai dobèrta sul monde.

Aital, lo cambiament es profitable per anar cap a un país mai dobèrt sul demai del monde. Pasmens, Estats-Units demòran Estats-Units e benlèu cal pas idealizar tròp l'òme. Barack Obama es favorable a la pena de mòrt, favorable al pòrt d'arma (se cal plaçar dins lo contèxt) , ... Mas estant lo pes de l'America dins lo monde (qu'es un fach), aquesta eleccion aurà de segur de consequéncias, doncas aqueste cambiament est quicòm de positiu. Mai que mai, l'eleccion de Barrack Obama es un bèl simbòl per la comunautat afro-americana que l'istòria es marcada per la segregacion, las discriminacions, la lucha dins l'encastre del movement dels dreches civics, ... I aguèt un caminament dempuèi "I have a dream", lo discors istoric de Martin Luther King, que parlava del pantais d'egalitat entre los òmes.

Pichòta anècdota lingüistica sus aquela eleccion per acabar. L'anglés e l'espanhòl foguèron pas las solas lengas de la campanha electorala. Un messatge en basc foguèt mandat per Obama pendent sa campanha electorala a destinacion de la comunitat bascofòn de l'estat : "Nevadako botuemaileek aldaketa posible egingo dute. Barack Obamarekin eta milioi erdi estatubatuarrekin bat egin ezazu eta egin zaitez, gaurtik hasita, gure taldearen partaide....", çò que vòl dire "Los electors del Nevadà faràn venir possible lo cambiament. Rejonh Barack Obama e un milion e mièg d'Americans dels Estats-Units et siá uèi dins la còla nòstra."(Comunitat basca-americana : http://en.wikipedia.org/wiki/Basque_Americans).

Eliotropisme & co.

2008-10-23T01:12:00.000-07:00

Un còp de morre : L'eliotropisme me confla dins los dos senses. Totjorn dins l'esquèma naut => bas, bas => naut, nòrd => sud, sud => nòrd. Mèfi, vau èsser un pauc caricatural e radical, mas bon aquò fa de ben de còps ! Explicacion : originari d'una region qu'a l'etiqueta « umida » vivi actualament dins una region qu'a la d'« ensolelhada ». Malorosament, rescontri a l'encòp d'unes de la region ensolelhada que se demanda cossí podem viure dins un endrech resumit “gris, umid e freg” e d'unes d'en cò mieu que migran cap al bas per lo solelh e la mar en escupissent sul luòc que quitèron amb solalç. Pòdi decidir de viure dins lo "sud" d'Occitània, prèp de la plaja sens pensar que la vida es òrra al "nòrd" en Franca-Comtat. Reclami aqueste drech! L'azard de la vida me menèt aquí. Segur que m'agrada, la vida aicí ... Òc, m'agrada de viure al solelh, de passejar per la plaja, de beure de muscat ... Compreni tanben que l'òme siá atrachat per la calor, per la mar ... Mas fin finala, dins aqueste encastre, lo fach d'aprene l'occitan es important que me dona l'impression d'èsser un pauc actor e non pas sonque consomator d'aquesta region "eliotropica" ont òm ven sovent pel solelh e la mar. Aital, dins lo Lengadòc qu'es una terra d'arribada es important de far conéisser la lenga occitana als arribants novèls.

La còca comtesa ...

2008-10-23T00:27:00.001-07:00

Coma promés, en seguida de las demandas, vaquí la recèpta de la "còca comtesa" ! Aquesta còca es la còca dels reis "oficiala" d'en cò mieu e venduda l'annada tota dins totas las bonas fornariás-pastissariás de Besançon. Dins un blòg "forra-tot", i pòdes botar qué que siá! Dins la dralha d'aqueste concèpte vaqui lo primièr article "culinari". De mai, estant que m'agrada de cosinar, aquò a sa plaça aicí !

Donc, vos cal :

4 uòus
1/4 de litre de lach
125 gramas de farina
75 gramas de sucre
1 pecic de sal
1 culhièra de sopa de flor d'irange
70 gramas de burre

Precalfar lo forn a 200 gras

Botar lo lach dins una caçairòla e lo far calfar

Apondre lo sucre, lo sal, lo burre, puèi los far fondre dins lo lach

Quand lo lach bolhís, apondre la farina en un còp

Plan remenar amb una culhièra fins a çò que la pasta se met en bòla

Apondre 3 uòus un a un en mesclant tot aquò

Apondre lo blanc del 4en uòu e gardar lo jaune

Apondre la flor d'irange

Burrar un plat o utilizar de papièr de coseson (aquò's bravament practic !)

Espandir la pasta cauda dessús

Daurar la pasta amb lo jaune d'uòu e far de raias amb una forqueta

Còser 20 minutas apr'aquí fins a çò que siá plan daurada!

Vaquí!

La lenga franc-comtesa

2008-10-12T09:01:00.000-07:00

Lo fach de parlar del franc-comtés sus aqueste blòg es un biais de far un ligam entre Franca-Comtat e Occitània. M'agrada plan! De mai, d'unes occitanistas an l'abitud desplasenta de considerar qu'al nòrd d'Occitània se parla solament lo francés e que francés = Lenga d'òil = Lenga de Paris. Es totjorn bon de donar d'informacions a prepaus d'aquò! Las lengas d'òil an tanben una diversitat. Lo franc-comtés pòt èsser vist benlèu coma un dialècte de la lenga d'òil mas es pas un dialècte del francés (qu'es tanben un dialècte d'òil). E mai se la situacion es diferenta qu'en Occitània, podèm veire tanben en Franca-Comtat, la resulta de la politica d'estandadizacion de culturas en França ... Lo franc-comtés es segurament una de mai amenaçada de las lengas d'òil. I a quitament pas de recèrca a l'Universitat de Besançon (alara que lo galò en Bretanha, lo picard, lo normand an un pauc de reconeissança dins las universitats ... vergonha, vergonha, vergonha, ... ). Coma sovent la lenga es ara gaireben desconeguda de la populacion e lo nombre de locutors se redutz ... Plan trist tot aquò ! Pr'aquò lo franc-comtés es una lenga rica amb d'influéncias multiplas : francoprovençala, germanica, ... Vos prepausi una revirada d'una partida de l'article que faguèri sus la wikipèdia en francés. Me calrà revirar l'article tot per la wikipèdia occitana !

Lo francomtés es una lenga romanica qu'aparten a la familha de las lengas d'oìl. Se parla subretot dins lo nòrd de la Franca-Comtat (lo sud de la Franca-Comtat es a "l'origina" de lenga francoprovençala) mas tanben dins lo nòrd del Canton del Jurà (en Soïssa) e dins una pichòta partida de l'Alsàcia, lo "Sundgau romanic" dins lo departament del Naut-Ren. Es sonada "franc-comtés", "lenga comtesa", "parlar comtés d'oìl" e sovent per lo tèrme de "patés". Pòt tanben èsser sonat "franc-comtés-jurassian" pel fach qu'es parlada a l'encòp en Franca-Comtat e dins lo Jura soïs.

Existís un pauc de literatura populara coma de nadals, qualques poèms e de contes. Los tèxtes en franc-comtés los mai ancians datan dels segles XVI e XVIIe. La lenga foguèt estada estudiada per qualquas personas : per Colette Dondaine, una universitària e Jean-Marie Marconot, cercaire del CNRS escriguèt un trabalh de sociolingüstica. Ca que la, faguèt paréisser d'articles a prepaus del franc-comtés dins la revista occitana de sociolingüistica "Lengas". Mantun lexic localizats son estats escriches.

Es dins lo nòrd del domeni qu'es encara la mai viva e que lo dialècte es lo mai ric e lo mens francizat : lo dialècte del costat de "Belfort" (Béfô en comtés) e Montbéliard (Montbyai en comtés) e subretot dins lo Canton del Jurà ont la lenga es un pauc ensenhada dins d'unas escòlas. Demòra d'associacions de locutors (amb d'unes que son naturals amb lo franc-comtés coma lenga mairala). Fan un trabalh bèl e fan paréisser regularament de publicacions, de cd e de lexic. Òsca a els !

Mai d'entresenhas en francés dins l'article Wikipèdia : http://fr.wikipedia.org/wiki/Franc-comtois

Lo primièr mini-lexic occitan / franc-comtés de l'istòria (!)

(Basat sul dialècte del nòrd del domeni)

soi = I seu
es = ç'ât
anam = nôs van
adieu / bonjorn = sailu / bondjoué,
Va plan ? = Coli vai ?
la vila = lai vèle
lo vilatge = lou velaidje
mercés = maichi
l'ordenador = l'ouërdenatou
l'aiga = l'âve
l'ostal = l'ôtâ
lo can = lou tchïn
lo cat = lou tchait

"Se ditz ..."

2008-10-10T01:42:00.000-07:00

Slam per las carrièras de Tolosa per "Lou Dàvi"

http://www.myspace.com/loudavi

Omenatge al maraton-fotò 2007

2008-10-01T02:33:00.000-07:00

L'an passat, foguèt organisat pel tresen còp un maraton-fotò per una associacion monpelhierenca "Les photogènes". De qu'es aquò ? Vaquì lo concèpte : 24 fotòs sus 24 tèmas de prene pendent 24 oras. Amb mon amigueta, participèrem a la version numerica (Existava tanben una version argentica). Se fasiá a partir del siti internet de l'associacion ont era possible de cargar sas fotòs per 6 per aver los tèmas novèls. Sercas d'objèctes, de luòcs, furgas dins las fotòs vièlhas, ... Te prenes lo cap pendent 24 oras, cercas encara en dormissent, ... L'endeman, a la fin del concors, es possible de veire totas las fotòs presas pels participants ... De veire tanben que n'i a que son de professionals amb d'aparelhs darrièra generacion (e que fan pausar de modèls !) o de pro de la farlabica numerica de las fotòs. Mas bon, coma se ditz : "L'important es de participar ", subretot que i aviá pas res de ganhar ! ;)

Aqueste article es una mena d'omenatge a aquela plan bona idèia : avem apres que serà pas tornat organisar en 2008 que l'associacion arrèsta sas activitats : tristesa granda! :'( Èrem ja lèsts per l'edicion nòva !

Los tèmas èron : Mesa en boca => Lo marrit guiton => Fluo => Dins l'ascensor => Corent d'aire => 20 ans aprèp => Saturacion => Zoom => Creissança => Coma una imatge => intocable => Jardin secret => Contorn(s) => Colleccion => Movement => I pensi sovent => Espaci => Proteccion => M'as vist(a) ? => Entrelaçats => Binòmi => De l'autre costat => Camoflatge => De seguir ...

Mesa en boca : Mèfi, i a de nivèl ! Aquí es un jòc de mot polit anglo-francés que marcha pas en occitan : entre la boca (que crusca la poma) e la boca de "Bush de l'ostal blanc". Èra la debuta de las 24 oras, èrem en vòia de la granda !

Zoom : Una mosca dins una escudèla de dessèrt, mmh! Erà una còca amb un coladís de fruch ... Fotò de los archius presa a la fin d'un repais del dimenge.

Colleccion : Eh òc, en Franca-Comtat, i a pas la mar, ni mai de cauquilhatges ... Me soi pas acostumat, me pòdi pas empachar de los amassar !

Espaci : ... de libertat ?

Movement : Mon pè que camina (per Melania).

Lo marrit guiton : Scèna banala per las plajas del canton, un gavian que tafura dins las bordilhas.

Camoflatge : Una paret vestida en pòrta ... Fotò presa dins una usina desafectada de Besançon.

I pensi sovent : Avenidor, Familha, Amor, Trabalh, Argent, ... N'i a que van pensar que soi bravament materialista aprèp aquesta fotò ;) Aprèp aver trantalhat, avèm causit lo pegatge de post-it sus la cara per aqueste tèma.

Saturacion : Ges de comentari ...

Lo siti : http://www.marathonphoto.fr/
Los ganhaires : aquí!

Lo Trainspotting catalan

2008-09-27T02:30:00.001-07:00

Ièr (divendres 26 de septembre) en fin de tantòst, anèri a un rescontre amb l'autor catalan Xavier Gual que se debanava al bar Bermuda Clafouti a costat de la librariá montpelhierenca Sauramps. Es es a l'encòp diplomat de filologia catalana, professor, jornalist e escrivan. Es considerat coma una votz nòva de la literatura catalana e coneis un succès grand en Catalonha.

Aqueste rescontre èra organisat a l'escasença de la sortida de Ketchup, son primièr libre traduch del catalan en francés. D'en pertot èra escrich dins los articles qu'es considerat coma lo Trainspotting catalan. Coneissètz Trainspotting ? Es un libre d'Irvine Welsh, un autor escocés qu'aimi fòrça l'estile (es tanben estat adaptat al cinemà). Los mots que me venon per descriure l'estile son : negre, tragi-comic e politicament incorrècte. Donc i anèri qu'es dins la mena de Trainspotting e qu'es catalan !

Donc Ketchup se debana a Barcelona e conta lo barrutlatge urban de Miki, jovent desobrat e mena d'anti-èroi. A l'entorn d'el gravitan mantuns personatges que son los miralhs d'aquela vida : junkies, dealer, ... Son acarats a la dròga, al racisme, ... Mena de "literatura sociala" (coma Trainspotting) l'autor mòstra a travèrs lo libre lo revèrs de Barcelona coma vila festiva e del dinamisme economic dels guidas toristics. Parla de los que son a despart d'aquesta capitada : una generacion abandonada entre revòlta e capitulacion. L'autor contèt que s'es inspirat de sos rescontres e de sos escambis amb de jovents barceloneses.

Un rescontre interessant amb aqueste autor que coneissiái pas, m'a donat l'enveja de lo legir !

Lo blòg de Xavier Gual : http://www.cosmopoli.blogspot.com/
Lo sieu siti : http://www.xaviergual.com/

Ketchup / Editor : "Au Diable Vauvert " / Colleccion : Litt Generale

Abansprepaus

2008-09-26T02:22:00.000-07:00

L'ora es arribada ara ... Es lo primièr messatge sus aqueste blòg. Me cal far un pichòt discors de dobertura senon serà un pauc brutal de començar directament ? D'accòrdi ... ("ròtlament de tambor"). Aprèp aver trantalhat, es fach, decidiguèri de començar un blòg (bon, d'accòrdi, es tanben un trabalh per la licéncia mas ... chut!).

Per situar l'autor : soi originari de Franca-Comtat, mai precisament de Besançon, pas tròp luènh de la Soïssa e soi arribat a Montpelhièr i a un pauc mai de dos ans. Comencèri d'aprene l'occitan pendent una annada Erasmus en Angletèrra (!) puèi mai seriosament quand arribèri dins lo Lengadòc. Fòrça interessat per las lengas, èra obligatòri per ieu de me metre a l'òc en arribant en Occitània. Pel costat tecnic, parli e escrivi lo dialècte de "l'immigrat" una mena de lengadocian occidental que d'unes sonan "l'òrre paul valerian estandardizat" :)

M'agrada de participar a la "blògesfera occitana". Plan segur, i a totjorn l'ànsia del blogaire que debuta , de qué vau parlar aicí ? De ma vida ? :/ D'un tèma ? :/ Del mond ? :/ ... Coma fòrça blògs, aqueste serà segurament un pauc forra-tot, una mescla d'un pauc tot çò que me ven a l'esperit e cambiarà segon mon umor. Vos desiri una bona lectura !

Lissandre